L’application De L’approche Par Compétence Et La Pédagogie De Projet Au Niveau De L’expression Écrite De La Langue Amazighe Au Cycle Moyen (le Cas De La Wilaya De Boumerdes)

Résumé: Tutlayt d ttawil n teywalt gar medden (tamɣiwent tamutlayt). Tamaziɣt d tutlayt i ttmeslayen watas n yimezdaɣ n tefriqt n ugafa, d tutlayt n lejdud swayes ssenfalayen ɣef yihulfan d tiktiwin-nsen. Tutlayt-a teḍha-d d taberranit seg wasmi teffaɣ fransa seg Lezzayer, armi d aseggas n 2002 i tuɣal d tutlayt taɣenawt, ma d tunsibt tuɣal deg useggas n 2016. Iwakken ad yennerni uselmed deg Lezzayer, imḍebbren teɛna temsalt, beddlen anekmar s yiswiyen s unekmar s tzemmar (APC), yebda usemres-is deg useggas n 2003. Anekmer s tzemmar, d tamudemt (mode) tasensegmit i yebdan tettsiɣ deg umadal deg yinagrawen n usegmi. Tasensegmit-a tegla-d s wudem amaynut n uselmed deg wayen yerzan : iswan, tarrayin akked uselmed deg tneɣrit. Tasensegmit-a tettarra inelmaden saɛɛun tamussni, yerna ad ten-terr zemren. Iwakken anelmad ad yelmed akken iwata ilaq ad yili deg tugnatin ideg llant tmusniwin (Tagnit-ugur). Xas akken yella-d ubeddel n unagraw n usedwel mazal yella lexsas ladɣa deg usenfali s tira di tmaziɣt. Ɣef waya i nra ad nexdem anadi ɣef usemres n unekmar s tzemmar deg usenfali s tira deg uswir n ulmud alemmas n ugezdu n Bumerdas. Agnu Akken ad naweḍ ɣer yiswi n unadi-nneɣ nheyya-d kra n tuttriwin ara yebnun agnu-a : 1. Iselmaden n tmaziɣt semrasen anekmar s tzemmar d uselmed s yisenfaren deg usenfali s tira ? 2. D acu-ten wuguren i d-ttmaggaren yiselmaden n tmaziɣt deg usemres n unekmar s tzemmar akked uselmed s yisenfaren deg usenfali s tira? Turdiwin Almend n ugnu-a, nezmer ad d-nefk turdiwin-a:  Iselmaden semrasen anekmar s tzemmar d uselmed s yisenfaren deg usenfali s tira.  Iselmaden ttmaggaren-d kra n wuguren yerzan: Asileɣ n yiselmaden, drus n wakud i asfkan i uselmed n ufares s tira Afran n usentel d yiswi-s : Aṭas n tmental i aɣ-yeǧǧan ad nefren asentel-a, gar-asent:  Lexsas n tmussni n yiselmaden ɣef usbeddi n unekmer s tzemmar.  Lexsas n wakud i ttmeddun i usenfali s tira.  Aswir n yinelmaden yuder ledɣa deg usenfali s tira. Iswan n tezrawt-nneɣ ttugten, mačči d yiwen, maca iswi agejdan d asemres n unekmar s tzemmar d usnerni n usenfali s tira n tmaziɣt deg ulmud alemmas. Assisen n umahil: Nebḍa amahil-a ɣef kraḍ n yixfawen . Deg yixef amenzu, newwi-d awal ɣef umezruy n tmaziɣt, nemmeslay-d ɣef wuguren i d-temugger tmaziɣt deg ubrid-is seg lqarn 19 armi d ass anda i tuɣal d tutlayt tunsibt deg useggas n 2016. Newwi-d diɣen awal ɣef udlisfus d twuriwin-is d wayen yeɛnan adlisfus n tmaziɣt. Deg yixef wis sin, newwi-d ɣef unekmar s tzemmar, aselmed s yisenfaren akked ufares s tira. Deg yixef wis krad, nga tasleḍt i tririwin n yiselmaden almend n yisteqsiyen i asennefka ɣef wayen yeɛnan asemres n unekmer s tzemmer d uselmed s yisenfaren deg usenfali s tira deg ulmud alemmas. Tagrayt: Deg tesledt i nexdem, nufa-d belli aṭas n yiselmaden i yessemrasen anekmer s tzemmar d uselmed s yisenfaren deg usnfali s tira, maca ttmaggaren-d aṭas n wuguren. Deg taggara nessaram ad nili nexdem tazrawt-a i wakken ad nessenfel deg-s ɣef usentel-nneɣ, ad nessebgen uguren i d-ttafen yiselmaden n tmaziɣt deg uselmed deg ugezdu n Bumerdas

Publié dans la revue: