Taynirawt N Taddart N At Ɛisa Uyeḥya, N Tɣiwant N At Yillilten

Résumé: Taynirawt n taddart n At Ɛisa Uyeḥya, n tɣiwant n At Yillilten, tawilayt n Tizi-Wezzu. Taddart n At Ɛisa Uyeḥya, d idles id yuɣen aẓar si tallit tamzikit, ayen id yennan ay-a maci d imawen n yimezdaɣ icekṛen iman-nsen, lamaɛna d udem n taddart amziki, d yidgan idelsanen, d yimezdaɣ yettidiren deg tegmatt, d yimɣaren n lbaraka id yettcebbiḥen tiɣimitin n yilmeẓyen iwakken ad asen-d-awin seg tmusni-nsen id-uwin seg yibabaten-nsen, neɣ seg umaḍal, d taddart n umezruy, ɣlin ḍeg-s 79 d ameɣras iwakken ad idiren warraw-nsen deg tmunent, d tlelli n tmurt, tasleḍt-a tassnalsant tessegza-aɣ-d yal taɣult di tudert n imezdaɣ, deg tazwara d asegzi n takkayin i neḍfer deg unadi-a, d tmental id aɣ-yeǧǧan ad nefren tasleḍt tassnalsant n taddart n At Ɛisa Uyeḥya, tarrayin d ttawilat d wuguren n tesleḍt, deg ixef wis sin nsenked-d taddart n At Ɛisa Uyeḥya, tarakalt-ines, tiwaculin, iderma, aneẓwu, agerruj n ugama, ixef wis kraḍ nefka-d tasmidegt n taddart, kraḍet n txeṣṣarin yeḍran di tallit n tegrawla n (1954-1962), deg useggas n 1975 d 1960, tiwaculin n taddart di tallit n tegrawla, iderma d yisem-awen n imeɣrasen n taddart. Syin nessewseɛ awal ɣef tɣessa n taddart id yettbanen s wudem aqbur s tugett, ɣas tekcem di tatrara lamaɛna ur tenkiṛ ara udem aḥeqqani n tudrin n leqbayel, nemmeslay-d ɣef ubeddel di tɣessa n taddart id yettilin yal tallit, anawen n yixxamen yellan di taddart-a d yidgan imzikiyen i mazal ar ass-a id yeǧǧan udem anaṣli i taddart, am ixxamen n leqbayel iqburen, tiliwa, lemqamat, izenqan iqdimen...atg, syin nefka-d talɣa n taddart n wass-a id yettbanen s wexxam atrar, tasegda-ines, tadwirt. Deg uḥric n tdamsa nemmeslay-d ɣef irmuden igejdanen n yal taddart di tmurt n leqbayel, mačči ala di taddart n At Ɛisa Uyeḥya, wa-gi d aḥric n temɣiɣert (ttṛebga n lmal), d sin n isekla yellan d igejdanen di tmurt n leqbayel azemmur, d useklu n tegrurt, nemmeslay-d ɣef uḥric n tenezzut, d ṣṣenaɛi tiqburin mazal ar ass-a, inirbiyen n taddart, d yiɣeblan id yettilin deg uḥric n tdamsa, Tuddsa timettit di taddart tebna ɣef twacult tawesɛant d twacult tamectuḥt, taddart tebḍa ɣef sin n iderma yal adrum s twaculin-is, tajmaɛt d tayunt tadeblat d tsertant isuddsen tudert n imezdaɣ gar-aneɣ d leqrun ɣer deffir, tasqamut n taddart ass-a tuwi adeg n tejmaɛt, tuddes s imbeddayen id yettufernen, zman ibeddel zwaǧ ur tmazal ara am zik, tameṭtut mbaɛd mi tella tettuseyyef ɣef wergaz, tuɣal ass-a teffeɣ teɣra, texdem, tesɛa azref am nettat am wergaz, ula d zzwaǧ-is d nettat ara tifernen, tinigt d tin icuɣben ilmeẓyen d telmeẓyin yettnadin ɣef tudert yifen tudert di lzzayer, idrimen asnefli, tusna, d timetal yesnernin tinigt di taddart, ɣer taggara nemmeslay-d ɣef tudert tadelsant di taddart n At Ɛisa Uyeḥya, nemmeslay-d ɣef tsekla timawit tigemmi takmamt yeddren deg tedmi n yimɣaren d temɣarin, tettawi tsuta i tayeḍ s ttawil n tmacahut, timsaɛṛaq, inzan, tamedyazt, nemmeslay-d ɣef yidgan idelsanen id yegran si zzman aqbur ttwaḥerzen smektayen-ten-id at taddart yal tikkelt wi gi d lemqamat, (lmqam n Bucker, Annar Tabextit), nebder-d kra n wansayen i mazal ḥeyyun-ten-id di taddart-a ar ass-a am unzaṛ, timecṛet, asensi n Buciker, nemmeslay-d ɣef tdukliwin n taddart d leqdicat-nsent yemxallafen, zzwaǧ amensay d wayen akk yurzen ɣur-s, nemmeslay-d ɣef ulmud seg uswir amenzu alama d tusnawit, nbeder-d kra n yigemmaḍ deg kraḍ n yiswiren-a deg useggas n 2020. Newweḍ n-ssuli leqdic-nnteɣ s wayen id negmmer n yisallen di yal aḥric n tudert n yimezdaɣ n taddrat n At Ɛisa Uyeḥya. Taɣerma tamaziɣt ur ilaq ara ad tennejli, yessefk ad nesseḥbiber fella-s s tira d timawit iwakken ad tedder yiss-nneɣ nekkni s warraw-is, ama d tanaṣlit-nneɣ, d ayen yurzen ɣer lejdud-nneɣ d wansayen, d laɛwayed, d amezruy, s wayen iwumi nezmer ama d tira fell-asen, d tizrawin icuban tid n teynirawt n tudrin n leqbayel...atg

Publié dans la revue: