Taynirawt N Taddart N Ilaḥluten, N Tɣiwant N Friqat

Résumé: Akatay-agi-inu yella-d ɣef teynirawt n taddart n Ilaḥluten, taɣiwant n Friqat, gelmeɣ-d taddart n Ilaḥluten s telqay, gelmeɣ-d tudert n imezdaɣ n taddart-a deg wayen walaɣ d wayen id ulsen kra seg imezdaɣ n taddart n Ilaḥluten, ɣas ulama ur ssaweḍeɣ ara ad gemmreɣ aṭas isallen deg uḥric n umezruy, imi ur d ufiɣ ara aṭaṣ n wid yessnen amezruy n taddart aqbur, leqdic-iw yebḍa ɣef ṣa n yixfawen, deg yal ixef ɣe wacu id yuwi: Ixef amezwaru d lsas n tezrawt-iw, d ixef n tasnarrayt: mmeslay-aɣ-d ɣef usentel id ferneɣ, timental i yiǧǧan ad ferneɣ asentel n teynirawt n taddart n Ilaḥluten, ttawilat n unadi, allalen n unadi, d tarrayin i ḍefṛeɣ deg umahil-iw, tamukrist-iw, fkiɣ-d iswi n tezrawt-iw, n ugemmer n isallen ɣef taddart n Ilaḥluten, mmeslay-aɣ-d ɣef tirza-inu ɣer wennar i yellan di taddart n Ilaḥluten, ɣer taggara bedreɣ-d uguren id ufi-ɣ deg tezrawt-iw.. Ixef wis sin, d ixef n trakalt d umezruy n taddart: Deg tazwara fkiɣ-d tarakalt n tɣiwant n Friqat, syin akkin fkiɣ-d tudrin id yezzin i taddart s rebɛa n teɣmar, imezdaɣ-is, leɛli-ines, tiwaculin n taddart, leṣnaf n wakal, adɣaɣ, aneẓwi-ines, gelmaɣ-d tiregwa, iɣezran, izṛa, tala n taddart, izuɣar, idurar, iḥarqan, , nniɣ-d anda id tezga taddart n Ilaḥluten d acu id as-d-yezzin di rebɛa n teɣmar, acḥal n imezdaɣ itesɛa, leṣnaf n yimɣan ara d naf di taddart, d yiɣersiwen n taddart n Ilaḥluten, deg uḥric wis sin n umezruy n taddart n Ilaḥluten anda id ules-aɣ taḥkayt yellan deffir n tlallit n taddart, amek i teɛmer taddart n Ilaḥluten, hedṛeɣ-d ɣef taddart n Ilaḥluten di tallit n tegrawla. fkiɣ-d tafelwit n ukkuẓet n imeɣrasen taddart di tallit n tegrawla n 1954. Ixef wis kraḍ, d taɣessa n taddart n Ilaḥluten:Nniɣ-d amek i tella tɣessa n yixxamen n taddart n Ilaḥluten, anda ttidiren imezdaɣ n taddart akka tura ( axxam atrar), imukan anda timlilin imezdaɣ n taddart, ( tazeqqa n jeddi n unejmuɛ, tala n taddart, tajebbant, iberdan n taddart) mmeslay-aɣ-d ɣef tsekiwin n ddula ( annar n waddal, leǧwameɛ d iɣerbazen). Ixef wis ukkuẓ, d ixef n tuddsa n tmetti: Mmeslay-aɣ-d ɣef twacult tameqqrant ara d naf deg taddart n Ilaḥluten yettuɣalen ɣer jedd-nsen Ḥmed Laḥlu, d twacult tamecṭuḥt, hedreɣ-d ɣef iferdisen nniḍen yesbedden timetti neɣ tudert deg taddart n Ilaḥluten, yellan zik mazzal-ten ar ass-a am tejmaɛt d uṣaḍuf n lḥerma, tajmaɛt n taddart, amezruy-is, amek i tuddes tejmaɛt di taddart, amkan n unejmuɛ di taddart, tiwuriwin-ines, ka seg iṣuḍaf-ines, hedṛeɣ-d ɣef tmeɣriwin n zzwaǧ, ṭṭhaṛa, tameɣra n taggara n useggas n leqraya, amek id tili lǧanaza di taddart, deg taggra hedṛeɣ-d ɣef tudert tasɣant deg taddart n Ilaḥluten, zziyaṛa d lḥiǧ Ixef wis semmus, uwiɣ-d deg-s ɣef Luzin n seksu, Laḥlu:Luzin n Seksu Laḥlu: mmeslay-aɣ-d ɣef yiwen n luzin ixeddmen asafar n tuččit agejdan ɣer leqbayel, melmi yeldi luzin-a, timental n uldi-ines, amezruy n seksu, asegzu n leftil n seksu, seksu n tmacint, d seksu n ufus, leṣnaf n seksu, leṣnaf n Berkukes, ixeddamen n luzin-a. Ixef wis seddis, d tuddsa tadamsant:Mmeslay-aɣ-d ɣef tfellaḥt di taddart n Ilaḥluten ara naf deg lxedma n wakal, alqaḍ n uzemmur, azraɛ n temẓin d yirden, ṣṣenɛa di taddart tella-d s urmud n lxedma n wuzzal, aḥric n tenezzut id yellan s tḥuna n tuččit, allalen n usiweḍ, irmad n tlawin ansayen id yegran d lḥirfat s wayes id ssaɣayent tadrimt am uzeṭṭa, lxedma n ufexxaṛ, taxeyyaṭ, asewwi n uɣrum ansay, deg uḥric nniḍen n tdamsa messlaya-aɣ-d ɣef temsalt n tinigt di taddart, bedreɣ-d ismawen n yiminigen n taddart n Ilaḥluten, fkiɣ-d timental n tinigt.. Ixef wis ṣa, d tudert tadelsant: Deg yixef-a mmeslay-aɣ-d ɣef wansayen n taddart n Ilaḥluten i mazal ar ass-a smektayen-ten-id, am usfuggel n useggas n imaziɣen deg wass n mraw d sin deg wayyur n Yennayer, ansay n tmecṛedṭ, mmeslay-aɣ-d ɣef laɛyudat n ddin am lɛid tameqqrant, lɛid tamecṭuḥt, Imensi n Lmulud, mmeslay-aɣ-d ɣef yidles imawi ansay am tmedyazt taqdimt yecban izlan, adekker, tasekla timawit tansayt yecban timsaɛraq, inzan, timucuha, deg taggara mmeslay-aɣ-d ɣef iselsa ansayen id yegran ar ass-a tt-lusen-ten imezdaɣ n taddart ggan-asen azal. Deg taggara ufiɣ-d d akken taddart n Ilaḥluten d taxelliǧt n yiwet n twacult tamrabeḍt, tebna s tatrar, ttidiren imezdaɣ-is s tatrar, am tudrin akk n leqbayel, mazal kra n laɛwayed d wansayen n zzman aqdim id smektayen imezdaɣ n taddart-a am tmecreḍt, aseggas n yimaziɣen, ad naf daɣen-nni tiliwa, ar huddent ara, ixxamen iqdimen ǧǧan imezdaɣ mebla ma hudden-ten uqbel ad ṣubben ɣer uzaɣar, ḍefren abrid n ddin ugar imi d imrabḍen, ula d tilawin rezzunt ɣer lǧameɛ i wakken ad ẓallent, d ayen ur d nettaf ara deg tuget n tudrin n leqbayel, annect-a akk yefka i taddart n Ilaḥluten udem-is d tmagit-is i ttimeyzen ɣef tudrin n leqbayel nniḍen.

Publié dans la revue: